অকণিৰ মনৰ বতৰা

ৰমা কান্ত দাস, গুৱাহাটী

অকণমানি ল'ৰা-ছোৱালী আমি

অকণমানি মন,

মা-দেউতা আৰু গুৰুজনক 

সদায় কৰিম প্ৰণাম।

পুৱা-গধূলি তুলসীৰ তলত 

নিতৌ চাকি জ্বলাম,

আমাৰ কুমলীয়া মনবোৰ 

আনন্দেৰে পোহৰাম।

আপদ-বিপদ আহিলে

ভগৱানক পাম।

বাৰীত আছে ভৰি 

লেটেকু-পনিয়ল আৰু মধুৰীআম,

লগৰীয়াৰ লগত স্ফূৰ্তিৰে 

সমানে ভগাই খাম।

ৰাতিপুৱাই উঠি গা-পা ধুই 

ভাত এমুঠি খাম,

পিঠিত কিতাপৰ বোজাটোলৈ পঢ়াশালিলৈ যাম।

সন্ধিয়া ধূপ-চাকি দি

শুদ্ধ মনে প্ৰাৰ্থনা কৰিম,

শিক্ষকে দিয়া কামৰ লগতে 

পঢ়া-শুনাও কৰিম।

জিৰণিৰ সময়ত

শুনিম বুঢ়ী আইতাৰ সাধু,

কাহ বেমাৰত পৰিলে খাম তুলসীৰ লগত মধু।

&&&&&&&&