বৰ্ণমালাৰ লটিঘটি

মীনাক্ষী গগৈ কোৱঁৰ

বকুলনি, দুলিয়াজান

ক ই বোলে কণপাই কঁকালটো পোনা 

অখণ্ড ভাগৱতলৈ সোনকালে ওলা....!

খ ই বোলে খৰধৰ নালাগে কৰিব

দেৰীকৈ পালেও কোনেও একো নক'ব....!!

গ ই সুধিলে তাক ছাগলীৰ গাখীৰ খালিনে নাই 

তোৰ বাবে সেইবোৰৰ কেতিয়াও অভাৱ নাই….!

ঘ ই ভাবিলে তাৰ আঢ্যৱন্ত ঘৰটো চাই 

আলাদিনৰ চাকিটো চাগে আজিও বিচাৰি পায়....!!

ঙ ই বোলে দুর্নীতি নির্মূল কৰিব 

চুঙা চাই সোপা সময়ত পাব....!

চ ই ক'লে চল চাই চাপৰি বজাবি 

মেলে মিটিঙে কথা ভালকৈ ক'বি...!!

ছ ই বোলে ছলাহিৰ মৰণ নাই 

সজ কাম সি নকৰিলেও নাই.....!!

জ ই বোলে চা চোন জগতৰ ইতিহাস 

বনবাসৰ পাছতো পাণ্ডৱে খাটিছিল অজ্ঞাতবাস....!!

ঞ ই ক'লে লাহেকৈ, চিঞৰি কথা নক'বি 

নিতৌ দুইবেলা হৰিনাম ল'বি…..।

ট ই ক'লে টকা পইচাই হিয়ালি জিয়ালিকৈ কান্দে

আজিকালি দেখাকৈ তাক কোনেও ফুৰিবলৈ নিদিয়ে…!!

ঠ ই আজিকালি বহুত ঠগন দিয়ে

বন্ধুৰ লিখনিকে নিজৰ ফেচবুকত ৰাখে.....|

ড ৰ হাতত আজিকালি ডম্বৰু নাই 

শিৱক বিচাৰি ভক্তই ব'লবোমলৈহে যায়....!!

ঢ ৰ হাততো আজিকালি ঢোলৰ মাৰি নাই 

অসমীয়া কৃষ্টিলৈ হাবিয়াস কাৰো নাই....!

ণ ই কাণৰ বিষত যদিও মলম ঘঁহে

আধুনিক ষ্টাইল বুলি কাণফুলিও পিন্ধে....!!

ত ই বেছি সময় অফিচতে কটায়

তোষামোদকাৰীয়ে তেওঁৰ হৃদয় জুৰায়....!!

থ ই নকৈ হ'ব খোজা কবি সকলক কয় 

থ চোন আনক তই ফ'ল' নকৰিলেও হয়....!!

দ ৰ পৰামৰ্শটো মন কৰিবলগীয়া 

দুর্বোধ্য শব্দ লগাই কবিতা দীঘলীয়া নকৰিবা….!

ধ আছিল ধৰ্ম যুধিষ্ঠিৰৰ কাষত বহি

পাশাখেলত কেনেকৈনো ধৰ্মৰ পৰাজয় হয় বুলি....।

ন ই মহাভাৰতৰ পাত লুটিয়াই চালে 

নকুল আৰু সহদেৱৰ বিশেষ ভূমিকা নেদেখিলে....!

প ই বোলে পাপৰ প্ৰায়চিত্ত হ'বই 

পিতামহৰ শৰশয্যাই প্রমান দিবই.....I

ফ ই ক'লে ফলাফললৈ চিন্তা কিয় কৰা 

দুর্যোধনৰ দৰে কুৰুক্ষেত্র যুদ্ধত সন্মতি দিয়া....I

ব ৰ হাতৰ বসন হাততে থাকিল 

কৃষ্ণইহে দ্রৌপদীৰ লজ্জা ৰাখিল....!

ভ ই বোলে ভোলানাথক কিহেনো পায় 

মোহিনীৰ পিছে পিছে কিয়নো যায়....!!

ম ই বোলে মন্থৰাৰ চৰিত্ৰ কুটিল,

মৃত্যুৰ পিছতো সমাজত তাইৰ কলঙ্ক থাকিল....!

য ই কয় যুধিষ্ঠিৰক অধৰ্ম কৰিলি

পাঞ্চালীক নুসোধাকৈয়ে পণত ৰাখিলি....I

ৰ ই কয় ৰাক্ষসৰো ভক্তি ক'ম নাছিল 

ৰাৱণহে দুর্গা-দেৱীৰ দুৰ্ঘোৰ ভক্ত আছিল….!

ল ই লক্ষণক সকিয়াই দিলে

ভাতৃ নহয় পত্নীয়েহে সংসাৰ তৰে.....I

ৱ ই কয় সকলোকে ৱাঘা ব'ৰ্ডাৰলৈ যাবা 

সেনাবাহিনীৰ আকৰ্ষণীয় কুচ-কাৱাজ চাবা....!

শ ই বোলে শিৱৰ পূজা মনতে কৰিবা 

বাটে ঘাটে জৰী গছত শিল নাবান্ধিবা....!

য ই কয় ষড়যন্ত্ৰৰ বলি নহ'বা

একলব্যৰ দৰে গুৰু দক্ষিণা কেতিয়াও নিদিবা....!

স ই বোলে কৌৰৱৰ নাম সুর্যোধন, সুশাসন আদিহে আছিল

পাণ্ডৱ প্রিয় সকলেহে দুর্যোধন দুঃশাসন আদি নাম ৰাখিছিল....।

হ ই কয় হিমাচললৈ আহি হিৰিম্বা মন্দিৰ চাবা 

ৰাক্ষসী হিৰিম্বাৰ সবিশেষ জানিবা.....I

ক্ষ ক মই অন্তৰেৰে ক্ষমা খুজিছোঁ 

বর্ণমালাক লৈ কিছু ধেমালি কৰিছোঁ.....!

ড় ই চাই থাকে দাড়িৰ মহিমা

দাড়ি নোহোৱা ঋষি মুনি জানো ক'ৰবাত দেখিছা...?

ঢ় ই কলে পঢ়া শুনাই হ'ল জ্ঞানৰ ভেটি 

নপঢ়িলে পথাৰত কৰিবি খেতি…..I

ৎ ৰ কোনো উন্নতি নহ'ল

কচৰৎ কৰোতেই দিন কাল গ'ল…..!

ং ই ক'লে কলং নদীত বহু দলং হ'ল

চামোৰাইৰ কাহিনী মানুহে পাহৰি গ'ল.....I

ঃ ৰ ব্যৱহাৰ ভাৱ প্ৰকাশত হয়

ইমোজিয়ে আজি কালি তাৰ ঠাই লয়.....।

ঁ বিন্দুয়ে কয় চন্দবিন্দুতেই বৰ্ণমালাৰ অন্ত

( চন্দবিন্দু ) দিলে জীৱনো সমাপ্ত.....!!

<><><><><>