শিক্ষাগুৰু

ইন্দু বৰুৱা

গুৱাহাটী

যি দিলে জ্ঞান মোক

জীৱন বাটৰ

তেওঁ মোৰ শিক্ষাগুৰু

অমিয়া মাতৰ।

আঙুলিত ধৰি মোক

শিকালে আখৰ

দেখুৱালে বিনন্দীয়া

বাট পোহৰৰ।

অংক, বিজ্ঞান জানে

জানে দেশ-বিদেশ

জ্ঞানৰ ভঁৰাল তেওঁ

গুণৰ নাই শেষ।

সকলো বিলাই দিয়ে

প্ৰসাদৰ দৰে

হাত পাতি ল'লে তেওঁ

সুখী হৈ পৰে।

মানৱতাৰ পাঠ দিয়ে

যি গুণ মহান

সঁচা-মিছা, ভাল-বেয়াৰ

দিয়ে তেওঁ জ্ঞান।

সত্য আৰু সুন্দৰৰ

পথ দেখুৱায়

তেওঁৰ ত্যাগৰ কোনো

প্ৰতিদান নাই।

ডাক্তৰ, ইঞ্জিনীয়াৰ,

পুলিচ, বিষয়া

গছ হৈ সকলোকে

দিয়ে তেওঁ ছায়া

সেইহেন শিক্ষকক

কৰোঁ নমস্কাৰ

যুগে যুগে জিলিকক

হৈ জাতিষ্কাৰ।

*********