সেউজীয়া বিকল্প - উন্নয়ন যথোপযুক্ত

মন্দিতা শৰ্মা, গুৱাহাটী

সপোন খেদা দুচকুত মাথোঁ উন্নয়ন অঞ্জন।

বিৰিখৰ নিৰ্মল ছাঁত লভে জীৱনে জীয়ন।

পৰ্বত-পাহাৰ বিদাৰি গঢ়ি উঠে একো একোটা ৰাস্তা,

জলাশয় নাশি অট্টালিকা আকাশস্পৰ্শা!

হেৰাই যোৱাৰ বেদনাত উচুপি উঠে গছে,

জীয়াই থকাৰ তাড়ণাত ৰাউচি জোৰে গছে!

সকলোকে লাগে উন্নয়ন--

প্ৰদুষণমুক্ত বিশ্ব যদিহে কাম্য

বৃক্ষাভূষণ পিন্ধোৱা ধৰণীক যথাসাধ্য।

ক্ষয়িষ্ণু নহওক বন-বনান্ত,

নদ-নদী, পাহাৰ-কন্দৰ

প্ৰকৃতিহন্তা উন্নয়ন,

কদাপি নহয় সঁচা অৰ্থত অগ্ৰসৰ,

নিশ্চিত এক শ্মশান দৰবাৰ।

উন্নয়ন লাগে; লাগিবই।

সেয়া হওক জনকল্যাণময়,

উন্নয়ন হওক বিজ্ঞানসন্মত,

প্রকৃতি তুষ্ট,

হৃদয়সম্মত।

সেউজীয়া ধৰা হওক বিকল্প,

তেহে সাৰ্থক উন্নয়ন যথোপযুক্ত।

উন্নয়নৰ আধুনিকতাত,

প্ৰকৃতিক নকৰিবা ৰুষ্ট —

কংক্ৰিটৰ পৃথিৱীতো থাকক গছ এটি,

প্ৰতি প্ৰকল্পই গঢ়ক হৃদয়ৰ ভেটি।

প্ৰকৃতি জীৱনৰ মূল,

ভৱিষ্যতৰ বীজতূল।

🌳🌳🌳🌳🌳